આ સરવર સરવર રમતાં રમતાં

આ સરવર સરવર રમતાં રમતાં કમળ કમળ થઈ ખીલ્યાં રે
આ ઝરમર ઝરમર ઝરતાં ઝરતાં રંગવાદળને ઝીલ્યાં રે.

વનનું લીલું ઝાડ લઈને આભે ઊડ્યું પંખી રે,
ટહુકાઓના ઊગ્યા તારલા: નજર ગઈ કોઈ ડંખી રે,

ફૂલની કોમળ પાંદડીઓમાં ચાંદ પૂનમનો ઊગ્યો રે,
આમ તો મારી આંખની સામે: તોયે વાદળે છૂપ્યો રે.

આ સરવર સરવર રમતાં રમતાં રડ્યાં હસ્યાં ને જીવ્યાં રે,
આંખોમાં તો ટહુકે કોયલ ભલે હોઠને સીવ્યા રે.