કોઈની ટિકિટ બાકી છે? બાકી છે? બાકી છે?
બોલજો જરી.
ભાઈ કંડક્ટર, કોનોટ પ્લેસ આસ્તે કરો,
ચૌરંઘી આસ્તે કરો
ઘોઘાસર્કલ આસ્તે કરો
કિંગસર્કલ આસ્તે કરો
લહેરીપુરા આસ્તે કરો —
નીચે બેસો
પથ્થરમારો — નીચે બેસો
ડ્રાઇવર, ભાઈલા, થોભતો નહીં
ક્યાંથી બેઠા?
ખ્યાલ નથી કંઈ?
ચાર રસ્તા કૈં કેટલા મળે —
ક્યારે બેઠા?
બત્રીસ વર્ષ —
ભઈ કંડક્ટર, આસ્તે કરો
માણેકચોક આસ્તે કરો
બેસો, નીચે બેસો
પથ્થરમારો — નીચે બેસો.
આમ તો જુઓ, ધૂળ ચડી છે
ધૂળ ચડી છે? આંધી છે? આંધી છે? આંધી છે?
થોભ કંડક્ટર
એક પેસેન્જર સ્ટૅન્ડમાં ઊભો રાહ જુએ છે
છેલ્લો હશે —
કોઈ સગો કે?
ખુલ્લા ડિલે કો’ક ઊભો છે —
એ જ તો મારો મોહનદાસ ગાંધી છે.
ગાંધી છે? ગાંધી છે? ગાંધી છે?
ભાઈ કંડક્ટર,
થોભ હવે તો —
આશ્રમ ગયો, થોભ હવે તો —
ગામડાં ગયાં, થોભ હવે તો —
શહેર અજાણ્યાં, થોભ હવે તો —
લોક અજાણ્યાં, થોભ હવે તો —
ટર્મિનસ ક્યાં? થોભ હવે તો —
સરક્યુલર રૂટ?
ક્યાંક ઉતાર તો ચાલશે, ભાઈ.
બેસો સજ્જન, આપણે બંને સરખા હવે.
બસમાં રહેશું, બસમાં સૂશું, બસમાં —
સરક્યુલર રૂટ?
થોભ કંડક્ટર, એ જ તો સ્ટૅન્ડ
થોડેક છેટે કો’ક ઊભું છે —
કોઈની ટિકિટ બાકી છે? બાકી છે? બાકી છે?
ભાઈ કંડક્ટર, થોભ જરી તો —
એ જ તો મારો સાકી છે, સાકી છે, સાકી છે —
કોઈની ટિકિટ બાકી છે?
બાકી છે?
બાકી છે?